نصائح تدوينية..

أكيد كل واحد عنده موقع على الانترنت سواء مجاني أو مدفوع أول شي بيسويه إنه بيفتح على موقعه أو لوحة التحكم الخاصة فيه إذا كان بيقدر يعرف المستجدات اللي صارت بموقع .. كأحدث التعليقات و التعقيبات و مين ذكر موقعه لأي سبب كان .. وبينبسط جداً وهو بيتحكم بمحتويات موقعه أو مدوّنته… لكن في عدة أمور مع حلول أنا شايف إنها صحيحة نحاول من خلالها تصحيح بعض الأخطاء (أو بمعنى أصح تصرفات) لأصحاب المدونات.

نبدأ بالسيرة الذاتية أو النبذة الشخصية … شي مهم لكل مدون إنه يحط معلومات عنه حتى ولو كانت معلومات قليلة لكن تبين شيء من شخصيته … الأغلبية للأسف أنا بشوفهم حاطين نبذة عنهم بتزيد من غموضهم .. أو بيكونو شايلين الصفحة هاي من الأساس.

طالما الواحد مثلاً بيعلق على مدونة ثانية ومعجب فيها ليش ما بيضيفها من ضمن مواقعه المفضلة على القائمة عشان يعرضها لزوار مدونته؟

هل زوار مدونتي بيقرأو الموضوع بس ولا بيقرأو معها التعليقات … هل أصحاب المدونات أو الضيوف بيزورو مدونات المعلقين على تدوينة ما .. اللي ما زاروهم من قبل ولا بيتجاهلو؟
بصراحة في مدوّنات بتكون قريبة جداً لتفكيرنا و بننبسط بزيارتها و بتكون جديدة علينا وهذه المدونات بنلاقيها من ضمن التعليقات وما بتكون معروفه بالنسبة النا..

بالنسبة للتصنيفات أو الكلمات المفتاحية (الموجودة في الإصدارات الحديثة من ووردبريس) هي مهمة جداً لترتيب تدويناتنا لتسهيل الوصول الها من قِبل زوّار المدوّنة.

مرات بيكون في موضوع مهم بالنسبة لنا في مدوّنة ثانية و حابين نتكلم عن الموضوع بشكل آخر مع وجود اقتاباسات من المدونة الثانية … يحبذ وجود رابط للموقع الثاني لسببين:
الأول : تبيين من وين المصدر اللي أخذنا منه الإقتباسات اللي حاطيناها بالموضوع.
و الثاني (مهم جداً بالنسبة لي) : رسم ابتسامة على وجه صاحب المدوّنة الثانية إنه في أحد اهتم بموضوعه واستفاد منه و نشر له موضوعه مع حفظ حقوقه.

في عندي وجهة نظر (أنا مقتنع فيها ومطبقها) .. مدونتي لا تعني إنه حياتي الشخصية فقط ، لا أنا بعرض فيها لمحة من شخصيتي و اهتماماتي و شعوري و ما يعجبني و ما لا يعجبني .. بينما بشوف كثير مدونات بيهتمو بنوع واحد وما بيغيرو النمط ليش؟؟ وهذه النقطة بوجهها لكم جميعاً. علماً إنه معنى تدوين هي إنك تكتب لمحات عن الشخصية و شوية إيش عملت و إيش أنجزت  و تكتب شويه عن اهتماماتك و إيش بيلفت انتباهك و إيش ما بيعجبك.. ومن كل غيث قطرة.
طبعاً هذه النقطة أنا بحاول أوصل من خلالها إنه إحنا زوار مدونتك حاببين نعرف عنك و شخصيتك ومعلومات عنك و شو أطباعك.

في استراتيجية بستخدمها خلال تدويني … وهي إنه بخلي بين كل تدوينة و تدوينة من يومين لأربع أيام بالعادة إلا في بعض المرات بيكون في حدث معين حابب إني أطرحه عشان يكون في وقت الحدث … ولإعطاء كل تدوينة مجدها من التعليقات وأكبر عدد من الزيارات.

في شغلة ثانية … المدوّنة إيش بتعني لكم؟ (المقصد هنا مختلف تماماً عن الإستفتاء اللي طرحته قبل فترة الأخت مضيعة بيتهم) يعني ايش بترتجي من إنشاءك لمدونتك؟ بالنسبة لي أنا بعبر عن شخصيتي و لمحاتي و مزاجي و هواياتي و تجاربي .. وانتو شو عنكم ؟؟

في ملاحظة على بعض المدوّنات اللي بتابعها … و هي إنه صارت أشبه بمنتديات و لكن بشكل مصغّر … يعني كل مواضيعه مقتبسة من المنتديات مع تعليق من صاحب المدونة بدون دراية عن الموضوع … طيب إيش الفايدة منها هاي الشغلة؟ ماكان ريحت حالك و كتبتها بمنتدى وكلمة منقول بالأخير… و هذا المفهوم عند البعض ( خطـــــــأ ).. إنشاءنا لمدونتنا هدفها الأول و الأخير كتابة مقالاتنا و خواطر و إلغاء كلمة منقول اللي بتعبر عن خاصية (نسخ و لصق) … فالأفضل أن تشارك بمنتدى … مع احترامي لك فأنت لست مدوّن ولكن منقّل (من ناقل).

شغلة مهمة جداً إذا كنت تحب أن يزور كل الناس مدونتك أو موقعك … انتبه ثم انتبه ثم انتبه من كلماتك بحيث إنه ما تضر أي إنسان سواء معنوياً أو ذاتياً سواء بتدوينة أو بتعليق ولا تقلل من شأن أي شخص … فكلماتك هي مفتاح محبة الناس لك.

آخر شي بالنسبة لوجهة نظري لإعدادات عرض المقالات أو الخلاصة .. أتمنى من الكل اختيار طريقة العرض كامل النص الخاصة بقارئ الـ RSS وذلك عن طريق لوحة التحكم باختيار إعدادات – قراءة : بالجزء الخاص بالخلاصات عرض أحدث 10 تدوينات و الخيار الثاني لكل تدوينة اعرض : نختار النص كامل ..

اللي عنده ملاحظة أو ملاحظات يا ريت يضيفها في مدونته بإضافة رابط لتدوينتي 😉
ودمتم بود و خير إن شاء الله..