مواقعنا العربية

دايماً بندخل مواقع عربية و منتديات عربية …. لكن للأسف كل منتدياتنا العربية عبارة عن (نسخ و لصق) كلها نفس الموضوع وفي أغلب المواضيع كلمة منقول أو ملطوش و بعض المواضيع بدونها ….. أو بتلاقي القسم العام عبارة عن اسئلة و أنت لازم تجاوب … كأننا في امتحان … لا ويا ريت أسئلة منها فائدة تذكر …. صدقاً مافي … كلها كلام فاضي مين بتحب ومع مين تزاعلت اليوم ومين شفت اليوم وإيش أكلت؟؟ ….. بصراحة شي ممرض جداً …. و في مواقع القوية بتلاقيهم متفننيين في الإعلانات اللي بتحول و بتجيب الصداع (أسود و أحمر و بتغير اللون بسرعة) و يا عيني على الجمل الملفته للانتباه (الحق فضايح فنانات .. فضايح بعرفش ايش … بنات على الكام و و و و و و) و الله اشي بيخزي على الآخر …. هذا اللي شاطرين فيه العرب (الفضايح)…
وبعدين من أسرار نجاح أي موقع عربي وجود برنامج تشات (الشات باللهجة العامية) ودليل مواقع و معرض صور و أسرار الماسنجر و قسم الجوالات البلوتوث …. ويا عيني إذا كان في تشات صوتي …. هذا التوب هذا أحسن موقع.

طبعاً كل الاهتمامات السابقة بتلاقيها نفسها في كل موقع لكن مع تغيير الشكل ….. كأنه هذا (package) جاهز وبتحمل على المواقع لكن مع حرية اختيار التصميم الخارجي.

بينما المواقع الأجنبية بتلاقيهم مركزين على شي أساسي … و بتلاقيهم حاطين روابط لمواقع ثانية …. يعني مش حاطين كل شي بنفس الموقع زي المواقع العربية ….. أنا واحد من الناس نادراً جداً ما أشارك و أكتب مواضيع بالمنتديات العربية …. من ورا القزز المعتاد .

وطبعاً إذا جبت موضوع حساس و مهم … بتلاقي مدراء المواقع سكروه إلك و هذا ينافي الدين الإسلامي …. طيب ليش حاطط منتدى و نقاش مش عشان اذا انا عندي فكرة غلط ممكن اقتنع فيها من الناس اللي يشاركو في منتداك العظيم هذا…

طبعاً اللي بيغيظني في المواقع العربية كمان شغلة النوافذ الـ (pop up) اللي بتخلي الواحد ينجن منها يعني غصباً عنك بدك تدخل الموقع الفلاني … و في مواقع بتحط لك رصد من الـ (pop up) خمسين على اليمين و خمسين على اليسار و كلهن على نفس الشاكلة أسود و أحمر و إلحق و فضايخ و بلوتوث…
مش شي بيخزي عن جد ؟؟

طبعاً في قلّة قليلة جداً من المواقع العربية محترمة ….

أتمنى إنه المواقع العربية ترتقي لأشياء مفيدة أحسن من الاهتمامات الفاشلة الحالية…