لو فيها زيت … لضوّت
من ثاني يوم وصلت على جدة و أنا بدوّر على بيت يكون نظيف ، وطلبي كان صعب نوعاً ما ، وما خليت بيت في الأحياء القريبة وأنا أدوّر على الإعلانات المعلقة على البيوت و لكن بدون أي فائدة ، وتحولت المهمة للبحث عن محلات العقار … وكل يوم استلمت حي أدور على محلات العقار و الله لايوريكم البيوت اللي دخلتها … الله يكرمكم مش نظيفة بالمرة .. المهم ماخليت ولا مكتب عقار يعتب عليّ … فبعد مشاورات مع أخوي يوسف … توصلنا لمثل بينطبق على المكاتب اللي دختها .. المثل بيقول (لو فيها زيت … لضوّت) شرح المثل في نهاية التدوينة.. 
المهم وإحنا بنتمشى في أحد شوارع جدة الفرعية .. لقينا مكتب شكله نظيف و مرتب … فقال لي روح شوف المكتب هذا … طيب وانا فاقد الأمل نهائياً في الحي اللي كنت أدور فيه ..
رحت مكتب قبل المكتب النظيف و قلت يالله بالمرة عشان ما ياخذ على خاطره مني بالمرة .. دخلت على الزلمة و قلت له طلبي … فنادى الحارس و قال له إنه يوريني الشقة بنفس العمارة فرحت شفتها بجد دخلت قلبي و ارتحت نفسياً الها الحمدلله … رجعت لصاحب المكتب و اتفقنا على السعر … و الله انه زلمة محترم بجد راعى إني لسه طازة بجدة وتساعد معي … و كتبنا العقد و أخذت المفاتيح .. و الحمد لله حالياً صار لي بيتي المستقل في جدة..
مع شكري و امتناني لأخوي يوسف اللي استضافني الفترة الماضية في بيته 🙂 .
————-
لو فيها زيت لضوت : المقصود فيها الفوانيس أيام زمان كانت تشتغل على الزيت .. فلو الفوانيس فيها زيت لكان ضوت أو نورت. وهذا المثل بينحكى في حال وجود خيارات مش مرغوبة أو مش متوافقة مع رغبة الشخص.