شركة النقل اللي حجزت معهم

اليوم رحت حجزت بشركة باصات أردنية (أرابيلا) والشركة الي بالسعودية المتعاملة معها على ما أعتقد شركة العالم العربي … المهم اللي خلاني أحجز معهم أنه رحلتهم يوم الثلاثاء (أقرب موعد مع هالأزمة الحالية كل الطلاب بيروحو على السعودية) … طبعاً عادة أنا بسافر مع شركة سابتكو السعودية الأصل مش الباصات الأردنية اللي بتتعامل مع سابتكو … لأنهم بيحترمو الزبون وعدا عن ذلك الاستراحات اللي بيوقفو فيها و السرعة المعقولة اللي بتخلي الواحد مطمئن نفسياً … لكن للأسف أقرب رحلة عندهم يوم السبت 16/6 يعني مطولين … وأنا حابب أسافر اليوم قبل بكرة من الطفش و الملل اللي هنا.
المهم حجزت مع أرابيلا مع الشروط تبعتهم كل مسافر مسموح له شنطة واحدة و أي عفش ثاني بينحسب على الوزن كل كيلو بنص دينار ما يقارب ريالين ونص …. يعني يا حبيبي على هالورطة… بما إني خلصت من الأردن معي 3 شنط ملابس و كرتون فيها كتب الجامعه.

طبعاً كله كوم و الموظفة اللي حاطينها كوم ثاني … ما كان الي نفس إلا أضربها … قاعدة بتحكي بطريقة غير لائقة .. مش لطيفة بالحكي كأني جاي أشحث منها اشي … وما في ابتسامة بالمرة و بتحكي كأنها عسكري مأنب … اشي مقزز فعلاً.
قالو ايش اللي حدّك على المر … قلت لهم اللي أمّر منه.
طبعاً الله يستر من السواق تبع الباص … ما عندهم قوانين صارمة زي سابتكو …

ادعولنا نوصل بالسلامة و يعدي يوم الثلاثاء على خير …

تحياتي للجميع