رحلة 23 ساعة من التعب :(
بجد اللي كنت خايف منه صار … طبعاً كان السفركان الساعة 3 العصر من الأردن فصحيت من النوم على الساعة 8 الصبح و لا إجاني نوم بعدها … المهم بالطول بالعرض مضت و وصلت الساعة 2,30 الظهر و رحت على الباصات وسألت عن الباص اللي هياخذنا قالو لي باص جديد و مكيّف … و طبعاً قالو انه الساعة 8 الصباح ثاني يوم بنكون بجده بإذن الله … واجى الباص و بانت الكارثة اللي صارت فينا … ولا كرسي في الباص ثابت كله بيتحرك مع المشي و ازعاج مش طبيعي كأنك عايش في منطقة صناعية وفتحات المكيف كلها مكسرة باستثناء 2 أو 3 … يعني ما في تحكم بالمكيف اذا برد الواحد … كنّا 16 شخص في الباص (هاي الحاجة الوحيدة اللي كانت كويسة في الرحلة)…. قبل ما نتحرك حكيت كلمتين مع شباب كانو قاعدين بالباص و بيّنت لهم مدى خوفي من هالرحلة و استيائي منها … مش عارف ليش بس طلعت اللي ببالي .. المهم تحركنا من مدينة عمّان إلى مدينة الكرك أو معان (واحدة منهن مش متذكر) صف الباص على جنب خرب فيه جهاز التيربو (طبعا الدنيا نار) وطفوا المكيف عشان حرارة الباص و قعدوا تقريبا ساعة يصلحو فيه (متنا من الحر) ومشينا فترة 100 كيلو و رجع خرب مرة ثانية و كمان ساعة مع الحر الفظيع … وصلنا الحدود على الساعة 9 بالليل … يعني 6 ساعات و احنا بالطريق لحد الحدود (أقصى فترة بتكون 4 ساعات) ووصلنا على الحدود السعودية بحمد لله و اطمأن قلبي … صحيح فقعوا قلوبنا بالتفتيش البايخ تبعهم علشان عددنا قليل و اللي مستلمين الوردية فاضيين أشغال و اشتغلو بعفشنا الشنط تنفلت قطعة قطعة و الكمبيوتر فتشوه و السيديات و تفتيش شخصي .. يعني قعدنا باستضافتهم تقريباً ساعة وبعد ما طلعنا من الحدود صار عندنا اشي طبيعي جداً كل 100 أو 200 كيلو يوقف الباص يصلحو بالتيربو …. وصلت جدة الحمد لله على الساعة 2 الظهر …. مكسر و عرق من الحر … وصل أخوي يوسف باستقبالي و سلمت عليه و على البيت تروشت على السريع وقعدت شوي معه ومع زوجته و بعديها وينك يا فرشة؟
طبعاً بس وصلت على جدة أول حاجة سويتها حمدت ربي إنه هذه آخر سفرة إلي بباص من/إلى الأردن و بعديها يا تحسّبت عند ربي عليهم من غلّي … بس اللي هون علينا شوي بالرحلة كان في طفلين بالباص ما شاء الله عليهم بيجننوا (الله يحفظهم لأهلهم) و كمان كانوا الشباب كثير مرحين و قصص و سوالف حلوة …
بجد الكذب و النصب دايماً بدمهم … شركات و محلات عمّان … يعني إذا ما كذبوا و نصبوا على الواحد ما بيرتاحوا … الحمد لله اللي الله فكني منهم
وأعتذر عن تأخير كتابة التدوينة … بسبب المخربين … اللي خربوا لي موقعي كامل (راجع لكم بتدوينة عن المشاكلل اللي سببوا لي إياها)
تحياتي و تقديري للجميع