رب تدوينة خير من ألف ميعاد

بمشيئة من الرحمن ، و في ظل ظروف طريفة جداً من خلال موضوع المكلا و العامر (الله يسامحك يا وليد) و المعاناة و الردود الي انكتبت عليها …. فكان من يؤازرني في الغربة الأستاذ فادي …. و اتفقنا بإنه أتشرف بالتعرف عليه …. و اجتمعنا أمس الأحد 29/4/2007 … وكان ماشاء الله تبارك الله من الشباب اللي بينحبو كثير و حسينا امبارح انه بنعرف بعض من زماااااااان ….. يااااااه.

بس الشي اللي صعقني امبارح في فادي اشي واحد …. بصراحة ما توقعتها و لا كانت بالحسبان و خصوصاً من بعد ردوده اللطيفة و المؤازرة في الموضوع إياه …..

طبعاً اتفقنا انه نطلع نتعشى مع بعض و نروح على كوفي شوب و نقعد فيه لأنه اعتذر انه يشرفني في بيتي … المهم اتقابلنا في مكان وشفته وشافني و بصراحة كان موقف حلو جداً كأنه واحد منا جاي من السفر ….. بس بجد كنت مبسوط جداً إنه تعرفت عليه بسبب التدوينة (على فكرة حبيتهم العامر و المكلا من ورا تعرفي على فادي) ….. المهم رحنا على المطعم و كانت الصاعقة ….. طلع فادي نظامه الغذائي نباتي 😯 … ما بياكل لحم و حكالي الدجاج بياكله بقلة و في المناسبات السعيدة…. أنا كنت مفكر فادي من الشباب الشبيحة في الأكل مثلي …. و أكلنا بوتيتو (حبة بطاطا مسلوقه و مشوية مهروس اللب اللي بداخله ومحشية خضروات زاكية كثير) المهم و رحنا الكوفي شوب وقعدنا تقريباً ساعة و بعديها روحنا على بيته وهناك تشرفت بمعرفة ابن عمّه محمد و صاحبه معتصم …. ما شاء الله تبارك الله شباب سُكّر…
بس كيف كان يؤازرني بالأكل و المطاعم و هو نباتي ….. بس عجبني تعليق امبارح من ابن عمّه (فادي عايش على الشيبس و البيبسي)

تحياتي مسيو فادي
تحياتي لكم جميعاً