بعض الأحداث
صارلي فترة بنام متأخر بس مش بكيفي و الله بحاول أنام لكن الفكر بيضله شغّال في كل اشي بيخطر على بالي … يعني بجد بتأخر بالنوم ومضايقني التأخير بالنوم والله … بس هاي الفترة هي اللي بجد بحسها إنها مهمة وصاحبة القرار معي على أساسها بعرف كيف أتصرف مع الأمور اللي بتدور براسي ….
المهم أنا باستنى في موضوع يصير إن شاء الله قريباً إنه يخلص … ومتشوّق له بجد كثير كثير
حاسس إنه راح تتغيّر حياتي من بعده للأفضل بإذن الله … (ادعولنا)
وفي بوست بدي أنزله كمان أكم من يوم … نتيجة القرارات اللي أصدرتها مع قرارة نفسي و متأكد من اللي بعمله و بحكيه بإذن الله…
يوم الخميس وأنا شغّال على الانترنت آخر حلاوة و مندمج باللي كنت بسويه على الانترنت … المهم رحت مشوار دقيقة و رجعت إلا الانترنت فاصل …. (يالله !!! تنكدت) وأحاول فيه إنه يشبك يمين يسار أبداً (لقد أسمعت لو ناديت حياً) … تذكرت إنه الاشترك بيخلص بنفس الوقت اللي فصل فيه … قلت يالله مش مشكلة بروح على بيت يوسف و بكمل الشغلة اللي كنت مندمج فيها … لما وصلت عند يوسف و سألته عن الانترنت لقيته مفصول عنده برضو … 🙁 فقلت ليوسف انه الاشتراك اللي كنت شغال عليه خلص انت اشتراكك بيخلص اليوم برضو … فقالي لا مش معقول يمكن الشركة عندهم مشكلة و لا اشي …
فاتصلت على شركة الانترنت و سألتهم إذا عندهم مشكلة بالاتصال و لا لأ؟ خبرني إنه ما مشكلة و عرضت عليه مشكلة الاتصالين … و أعطيته إياهم … من سوء الحظ أو الطريف (مش عارف إيش الكلمة اللي مفروض إنها تنقال) إنه الاشتراكين انتهو بنفس اليوم و الوقت … ويوم خميس كمان …. (يعني كملت وراحت للسبت) … بس أخوي القوي يوسف تدارك الموضوع و جدد اشتراكه عن طريق الفيزا 
أقوى نوع أنت يا يوسف 🙂
في شغلة افتقدتها صارلي فترة ما شفت البحر …. صحيح بشوفه كمرور عنه … لكن قصدي القعدة على شط البحر هي اللي مفتقدها … مقضيها مع أخوي يوسف من سوق أثاث لإيكيا .. وهكذا و آخر اليوم حفلة الفساد لا بد منها … وتعيش الأرقيلة تعيش تعيش تعيش .. وكمان القهوة قلت كثير عن الأول …. بصراحة مشتاق للقهوة كثير …
لكن إن شاء الله حاططها من ضمن الخطط اللي بدي أعملها بس أكون فاضي أشغال … قعدة على البحر وكاسة قهوة من عند العم بارنيز … على أنغام كوكب الشرق أم كلثوم و أحلى صبابا …
طولت عليكم …
لكن دمتم بعافية و راحة بال ..