الدراسة عند العرب
موضوع يأرقني بشكل مش معقول ….
وهو الكذب و النصب في المعاهد و الجامعات عند العرب …. نرى المباني مخيفة و بنحكي في نفسنا أنه بس …. هاي هي الجامعه أو المعهد اللي ممكن إنه يوصل لي العلم اللي بحتاجه … و لما تدخل على التسجيل و القبول بتلاقي جميع انواع البهرجه و الكذب و الزيف في المميزات اللي بتقدمها للطالب و طبعا قبل هيك بيحكيلك مبلغ التسجيل انه قديش هو قليل بالنسبة للميزات الضخمة اللي بيقدمها ….. فطبعاً الطالب أكيد راح يغتر و يقول بس و يحكي لأهله و أصحابه انه المعهد أو الجامعه اللي انا بدرس فيها هي احسن اشي و بتقدم العروض الآنفة ….
مجرد إنه الطالب يدفع القسط ويبدأ بالدراسة … بيبدأ شوي شوي يكتشف النصب و الاخلال بالاتفاقيات و انه حرام فيهم ريال واحد … طيب ليش ما سووا اللي قالوا لي عنه في البداية … بس بنوصل لمرحلة بنقول فيها الله لا يسامحهم و الله حرام فيهم و حسبي الله عليهم …
بتذكر معهد العالمية لما سجلت فيه بسنة 2000 … قالوا لي انه بندرس المواد التالية و الشهادة تبعت المعهد بتيجي من بريطانيا ….. و احنا الخطة الدراسية تبعتنا ما بتخلصها الاو انت بتعرف كيف تسوي برامج ضخمة و كيف تسوي أي اشي بدك اياه بالكمبيوتر …. (طبعاً أيامها أنا كنت خام في اشي اسمه كمبيوتر) فجال في بالي كيف راح أصير بعد ما أخلص المعهد …. المهم أثناء الدراسة بديت اكتشف انه المواد يمكن واحد سبّاك أو بياع بطاطا اللي حاططها … و لا إلها علاقة بالبرمجة …. كل اللي استفدته من المعهد إني كيف استخدم المايكروسوفت أوفيس …. المهم خلصنا المعهد بمعدل 4.59 من 5 و قاعد بستنى بالشهادة اللي من بريطانيا … لكن الصاعقة لما شفت الشهادة من المعهد و عليها تصديق من جامعة الملك سعود… فسألتهم وين بريطانيا وبكل برود و استهبال جاوبوني ايش مالها بريطانيا ما عندنا غير هالشهادات …. آمنا بالله واخذناها عشان نشتغل فيها …. الراتب اللي وصلتله فيها 1000 ريال …. يا خسارة …
وبالنسبة للجامعه اللي بدرس فيها (جامعة عمان الأهلية) أنا مسجل فيها تخصص على أساس (أنظمة معلومات حاسوبية) طبعاً لما تقرأ الخطة الدراسية بتحكي وااااااااو بس أنا وصلت …. بس لما وصلت لآخر فصل بتذكر شو اللي استفدته من المواد اللي أخذتها … لا شيء!!!!
قعدت أراجع بالمواد اللي مكتوبة بالخطة … 9 مواد رياضيات و فيزياء ولاب فيزياء و 14 مادة حرة واختيارية مالها علاقة بالتخصص و 10 مواد إدارية 8 مواد برمجة (بالكثير يعني فيهم مواد اسمبلي و تراكيب بيانات و برمجة كينونية) وتدريب عملي و مشروع تخرج وباقي المواد نظم تشغيل و شبكات وانظمة حمايه …
يعني مواد البرمجية اللي بندرسها …. انقرضت ماحدا صار يدرسها لكن احنا عرب كيف نواكب التدريس الحديث …. قديمك نديمك !!!!
طبعاً في مساق مشروع التخرج روح وخبط بحالك سوي برنامج معتبر على مستوى عالي من الكفاءة و الأداء كما علمتك الجامعة الموقرة بلغة سي وجافا الي يدوب بيعلموك فيها كيف تطبع ارقام و نجوم بأشكال مختلفة … و في الأخير في المناقشة تنحكى لك كلمة (مشروعك فاشل هذا بينعمل بيومين).
مره قابلت واحد من أصحابي بيدرس في (جامعة فيلادلفيا) وكانت معاه الخطة الدراسية لأنظمة المعلومات الحاسوبية و الله إني انصعقت لما شفت المواد اللي بياخذوها طبعا أغلب المواد بتنقسم لمبتدئ و متقدم مثلاً مادة برمجة جافا1 وجافا2 و هكذا …. طبعاً كل المواد اللي بيدرسوها هي مجال العمل في السوق بالوقت الحاضر ….
وسمعت من شباب كثير و أغلبهم ثقة – الطالب لما بيتخرج من جامعة البلقاء التطبيقية بياخذ الشهادة الجامعية بالإضافة لسبع شهادات دولية من ميكروسوفت و سيسكو واوراكل ….
بس اللي بفهمه انا من أغلب الجامعات و المعاهد تعال حط فلوسك و روح ما الك اشي عندنا غير الشهادة اللي مش معترف فيها كمان …. و العلم سلامتك صباح الخير أي دراسة …
والله الدراسة بالجامعات العربية اشي بيخزي عن جد ….