الحمدلله اليوم نعنشت :)
من تاريخ 22/10/2007 إجيت على جدة استقر فيها و الحمدلله … و اشتغلت بشركة واخلو معي بالاتفاق المبرم بيني و بينهم (الحمدلله) و أكرمني الله بشراء السيارة يوم 12/12/2007 طبعاً كان الوضع متبهدل (زي ما بتعرفو الديون) وخاصة إني اجيت على جدة كان معي مبلغ بسيط (من والدتي الله يكرمها ويعطيها الصحة و العافية ويخليها تاج على راسي وراس أخواني) عشان أقدر أصرف على حالي شوي … و الله أكرمني بأخوي يوسف (والله أنت كلك يا يوسف على راسي من فوق) اللي تكفل بأغلب مصاريفي و احتياجاتي المادية … لكن كله على الدين…
فكرت بعدة أفكار إنه كيف بدي أسدد ديوني وأبدأ في مشواري و تحقيق امنياتي …. فدخلت بجمعية كنت مفكر إنها هتفك أزمة لكن زادت الطين بلّة وتورطت بالسداد لحد ما خلص تنفست نفس الصعداء وحرمت و الله لو على رقبتي ما بدخل جمعية مرة ثانية …. وصرت اسدد وكل يوم احسب كم ضايل علي وكم بدي ادفع وايش بدي اخلي مصروف و كمان إيجار البيت و الحاجات اللي بتطلع ما بتعرف من وين بتطلع…. وحوسة لا يعلم فيها الله…
لكن اليوم الحمدلله وبفضله الكريم أنا مبسووووووط جداً الحمدلله انتهيت من سداد آخر مبلغ من الدين اللي كان عليّ … وصارت السيارة لي شرعاً و قانوناً (فهي أول الثمرات اللي كنت بدي أجنيها) ….
هيك الواحد بيعرف يقعد مرتاح بدون ديون 🙂 … حالياً الالتزام اللي عليّ هو إيجار الشقة … بس ما بعرف حاسس إنه في مشاريع هتدور براسي بس شو هي الله يستر 🙄
دمتم بود وبدون ديون وراحة بال