أنا مستاء من الوضع!!!

أمس كنت في البيت مشغل السخّان و بستنى المي (الماء) تسخن لمدة ساعتين تقريباً مع العلم إني شيكت على وجود الماء قبل تشغيل السخّان … المهم فتحت المي عشان أبدأ بحمامي …. هووووب المي انقطعت و هذه إحدى أسباب تذمري من البيت …. أنا كان فيّ عقل و طار.
المهم طلعت أدوّر على الحارس اللي كل مرة بيعطيني تصريفة من اللي يحبها قلبكم و على السريع يصرفها (موية مافي موجود – موية بكرة ييجي – موية قليل …. إلخ.) المهم لقيته عند صاحب المكتب اللي هو صاحب العمارة أصلاً … و دخلت بالحامي عند العم حسن إيش هذا الكلام يا عم حسن؟؟ من أول ما سكنت في الشقة و الموية مقطوعه و كل يوم يقولي الحارس بكرة بتيجي بكرة بتيجي … أنا مستأجر أقعد استنى في الموية تيجي و لا كيف يعني؟؟ بصراحة إنخنقت من البيت … ما بينفع هذا الكلام … طبعاً الظاهر إنه العم حسن ما كان عنده خبر بالمصيبة اللي كان مسويها الحارس … ولاّ العم حسن بعد نقاش إنه هدّي يا سامي مش مستاهله … و أنا أبداً !!! بجد اشي لا يُطاق !!! المهم اجى العم حسن و شاف المي كيف مقطوعه و هو عنده خبر إنه الخزانات مليانة … اتطلع على الحارس وقعدو يتناقشو قدامي … اللي طلع من النقاش إنه الحارس (…………) مسكر عليّ المحبس تبع المي …. راح فتحه و اجت المي …

خارج عن النص : الطريف بالأمر إنه العم حسن شاف كيف شابك كمبيوتري بالكهربا (بالمرة خليها تكمل) …. الفيش بالمطبخ وممدود سلك الكمبيوتر للصالة (آخر حد لطول سلك اللابتوب).

فحكالي العم حسن إنه ليش ما خبرتني من الأول … قلتله أنا خبرتك و إنت قلتلي انه المي بتقطع و مرات بتجيبو وايتات تحلية (وصار العم حسن يهزأ في الحارس بجد طفى غضبي شوي) … المهم خلاصة الكلام توصلت مع العم حسن لاتفاق (و بصراحة كان العم حسن متفهم معي – عكس ما ظنيت بصراحة-) قلت له يا عم حسن أنا ضايل لإيجاري عندك شهرين إلا اكم من يوم … بدي إياك تلاقي لي شقة ثانية بعمارة جديدة ما احد سكنها قبلي لأنه أنا خلااااااااص انتهيت و قرفت من البيت.. ماني مرتاح نفسياً بالمرة منه … بدي أطلع من البيت ما بقعد فيه ولا يوم زيادة عن إيجاري فيه … فقالي أنا مقدر هالشي و صدقني راح أهتم لك بالموضوع … و الحمد لله برّد لي دمي بهالكلمتين.
لما اجت المي و الله ما كان الي نفس إلا أمسك الحارس و أنزل فيه ضرب لين ما يعرف أنه الله حق و المي أهم من وجهه.

أسباب تذمري من البيت بشكل عام:
أول شي البناية قديمة – الكهربا 110 فولت … بس فيشين 220 فولت و في المطبخ الاثنين – المي كانت لحد امبارح بتقطع باستمرار – و السباكة تبعت البيت تعبانة بتنزل مي بنية من الوسخ – و الحفريات اللي صارت قدام العمارة.
راح تسألو وإيش اللي خلاك تستأجر هالبيت؟؟
أول شي أنا كنت أدور على بيت أستأجره .. و لازم ألاقي بيت خلال 10 أيام من وصولي على جدة.
ثاني شي أنا شفت البيت في الليل و هذه غلطتي .
ثالث شي ما خطر ببالي إنه في بيت كل كهربته المعتمدة 110 فولت … متعود على بيت الأهل و بيت يوسف و بيتي اللي كان في الأردن إنه الكهربا المعتمدة 220 فولت و في فيشين ثلاثة 110 فولت .
رابع شي سألت عن المي و قال لي العم حسن إنه إذا قطعت بالكثير يوم أو يومين بالشهر.
وغيره فكانت هذه الأمور مشجعة إني أسكن بالبيت لكن بصراحة انصدمت بالواقع … تخيلو لأي درجة !!! و الله بطلع من البيت ما برجع غير أغير ملابسي و إذا كان الحارس حانن عليّ إني أخدلي حمام .. أو للنوم فقط لا غير … يعني بالعربي قعدتي في البيت ما بتتجاوز الـ 9 ساعات.

والله مصيبة بالنسبة الي .. مش قادر أتحمل البيت مخنوق منه و الله …
(قلت خليني أفضفض لكم شوي)
دمتم بود