أكشنات الفترة 5 يوليو 2
جاهزين ؟؟؟ يلا نكمل…
انصدمت السيارة للمرة الثانية بس هاي المرة كانت صعبة بالنسبة لي فمع زحمة جدة و طريق المدينة توقفت المسارات كلها وكان حظي أكون آخر واحد … فمسكت يد الإشارة وبتطلع بالمراية على اللي جاي من وراي ما لقيت الا سيارة مسرعة وراي فتأهبت للحادث و عبست بوجهي و ضغطت راسي للأمام بانتظار الصدمة و فعلاً ثواني سمعت صوت كفرات سيارته و خبطتها بسيارتي ….. 🙁 ما ضل اشي بالسيارة مكانه كل اشي وقع حتى نظارتي لقيتها تحت الكسي اللي جنبي … المهم نزلت أشوف الصدمة من ورا لقيتها خفيفة الأذى (خدوش بالصدام و خبطة بسيطة جداً بالشنطة) الحمدلله رجعت اركب السيارة اجيب جوالي اكتشفت انه من قوة الصدمة اني صدمت السيارة اللي قدامي ويد الإشارة اللي كنت ماسكها انكسرت …. يا للهول 😯 كانت جامدة من قدام المهم ثواني معدودة اجت سيارة المرور و طلعنا من الطريق العام على الخدمة وعرف القصة واحنا في الخدمة و حولنا على القسم … ما راح أحكي عن الطرائف اللي صارت بالقسم لكن اللي صار انه اللي صدمني تحمل كافة الإصلاحات لسيارتي و سيارة اللي قدامي …. رحنا لتقييم الإصلاح كلفت مبلغ (2400ريال إصلاح و قطع) قلنا يالله لعله خير لاحظت بورقة التقييم مكتوب شمعة أمامي 50% وناقشتهم فيها (عشان المرور) كيف يعني 50% قالولي لا ما عليك فيها ما راح تأثر معاك باشي … قلنا ماشي لما وديتها على المرور عشان اخذ فلوس التصليح إلا العسكري حسب بالالة الحاسبة و قال لك مبلغ 2150 ريال قلت كيف هو الي صادمني من ورا و التقييم قال 2400 ريال و الحق 100% عليه … قال لي العسكري انه هنا النور مكتوب 50% (طبعاً سعر الشمعة 600 ريال) … طبعاً الي صدمني ما صدق خبر طلع 2100 ريال و قال ما معي صرف للخمسين وأتناقش مع العسكري و أبداً لا حياة لمن تنادي وطلعت بكيسي وكمان ناقصة خمسين ريال كرماً من اللي صدمني الحمدلله على كل حال ….
والله ما فرقت معي الل 300 ريال ولاني شايلها من أرضها لكن اللي ضايقني الطريقة اللي أكلوني فيها … بعد القصة قلت للعسكري (بعصبية) أسألك بالله بدك إياني أقول لبامعروف أعطيني شمعة 50% ؟؟؟؟!!!!!! (حسيت إنه استوعبها) المهم اسبوعين وانا اطارد على الورش و قطع الغيار عشان يد الإشارة اللي ما هي راضيه تزبط معهم… و الحمدلله تم الإصلاح ودفع فلوس زيادة من جيبي على التصليح عدا عن مصاريف التكاسي رايح جاي…. 🙄 و الحمدلله على كل حال.
بيكفي اليوم… نراكم قريباً بإذن الله
دمتم بود وراحة بال … و الله يبعد عنكم العصب السابع 🙂