أكشنات الفترة من 5 يوليو1

السلام عليكم و رحمة الله و بركاته
بداية أشكر كل من افتقدني وسأل عني وأخص بالذكر: شموخ ملكة و Mohammad Irshid و وردة و محمد و عابر سبيل و مضيعة بيتهم و أدهم و Exganza و smilefirst و أحمد بدرة و حنان و محمد بن سالم و أمنية العمر و ابراهيم القحطاني و محمد منصور بيك باشا الأول و توازن و edimido و ندى الفجر

من يوم 5 يوليو 2008 استأذنت من التدوين لعدة أسباب اللي هي :
1- الشعور بالخمول من الناحية التدوينية.
2- كان عندي ضغط شغل وكان المفروض إني أفرغ نفسي تماماً من أي شي لأجله لدرجة إني نسيت إنه عندي مدونة ( لوووووووووووول كبيرة هاي والله).
3- تفادياً لبعض الأزمات اللي كانت مواجهاني من خلال التعليقات… لكنها انتهت والحمدلله.
وغيرها …

المهم … صار معي أكشنات برمجية وغير برمجية راح أسرد بعضها و البعض الآخر سأحتفظ به لنفسي…

من الأكشنات الغير (برمجية) …. استمتعت جداً مع أخوي يوسف وشباب ما بنعرفهم برحلة صيد بحرية تم التخطيط لها بوقت قصير جداً وصدنا كمية لا بأس فيها من السمك و الظريف بالموضوع إنه أول مرة بروح رحلة صيد و أول مرة بصطاد سمك صدت 4 سمكات (لا والله مكثر!!!! لووووووول) طبعاً كنت الحظ الأقل بين الشباب …. لكني معذور أول مرة بجرب هاي التجربة …. وما بعرف أشك إني صدتهم بالحظ (لوووووووول).
بس والله رحلة إجت بوقتها لأني خلاااااص كنت راح أنفجر من ضيقة الخلق… الحمدلله على كل حال… دامت الرحلة من الساعة 9 المسا تقريباً لحد الساعة 11 الظهر ثاني يوم … طبعاً حاولت بكل ما استطيع إني أضلني صاحي معهم لكن لاحياة لمن تنادي …. والله ما عندهم !!!! المهم أنا فكرت ايش أسوي عشان ماأوقع لا جوة المركب و لا برة المركب (يعني في البحر لوووووووول) لقيت حل واحد أني أمسك حدايد المركب و أربط حالي فيها (بدون حبال لووووووول) وهاتك يا نوم … استملت خط وصلت تركيا و رجعت كانت فترة لا بأس فيها 3 ساعات نوم و الله ما أحد حولي و لا سامع أي اشي لا صوت البحر و لا صوت الشباب من قوة النوم و التعب … ورجعت أكمل المهنة تبعتي (صيد السمك)… طبعاً كانت ممتعة جداً الرحلة.

استمتع بالطلعات مع أصحابي من أيام الجامعه تقريباً بأغلب الأيام لحد ما إجتني آفة العصب السابع … نمت وصحيت لقيت نص وجهي الأيمن بمظهر غير طبيعي و عيني ماني قادر لا أسكرها و لا أتحكم فيها … رحت صيدلية قبل المستشفى … فجزاه الله خير الصيدلي قالي عن هاي المشكلة وإنه بدها من شهر لثلاث أشهر لين ما تروح ويرجع وجهي وجسمي الجهة اليمنى بشكل طبيعي … بصراحة موقف لا أحسد عليه و نفسياً تعبت منها وقال مافي فايدة لو أعطيك أدوية من هنا لبعد سنة ما الها علاج لكن العلاجات اللي موجودة كلها ضحك على الدقون (بما معنى كلامه)…قلت ماشي … لكن مش مرتاح ورحت على (المجزرة الماليه) المستشفى ودفعت الكشفية عشان أتكلم مع الاستشاري و بالأخير يقولي حالتك طبيعية و نفس كلام الصيدلي لكن زاد عليها إنه بدو أشعة رنين مغناطيسي سعرها 760 ريال عشان يتطمن بزيادة .. المهم سجلت اسمي للأشعة طلع موعدي بعد أربع أيام قلت ماشي و طلعت من المستشفى ولما اجى موعد نومي نمت بدون مكيف (ولا زلت إلى الآن) وكل يوم الحمدلله في تحسن …رجع وجهي طبيعي و صرت أتحكم نوعاً ما بعيني – صحيح انه مش مثل الجهة اليسار لكن أفض من الأول بكثير … الحمدلله على كل حال.

تقابلت مع مدونين جدة مرة في (second cup) وبجد انبسطت جداً بمعرفتهم … الفضل لله ثم أحمد بدرة اللي ذكرني بعد ما تأخرت عليهم (لأني يومها ما كنت فاضي أحك راسي)…

وشرفنا المدون الغالي أبو سعد من الشرقية يومين … أروع يومين بجد …. تشرفت بشوفته و بالقعدة معاه والسواليف الحلوة وبحضرة أرطبون الحادي عشر  أتمنى إنك تعيدها ياأبو سعد قريب…

إيش كمان …. إيش كمان ؟؟

خلص بيكفي اليوم …. أكشنات غير برمجية.
نكمل المرة الجاية.

دمتم بود وراحة بال