أسراري يا متطفل

لكل إنسان خصوصياته اللي ما بيحب حدا يتطلع عليها  شو ما كانت درجة الأهمية ، مهمة أو تافهه!؟ … لكن مرات بيجيك واحد غليظ فظ بيمتلك روح الشطارة و التجسس و بيحاول إنه يوصل لخصوصياتك ….. مثلاً كل واحد منا تقريباً عنده جوال واحد على الأقل و طبعاً زي ما بنعرف كل واحد بيخزن عليه أرقام العائلة و الأصدقاء و الصديقات و المعارف و الشغل و طبعاً بيستقبل عليه مسجاته الخاصة … و ممكن تكون عليه ملفات خاصة فيه إذا كان نوع الجوال متقدم تكنولوجياً….
أو مثال ثاني ، جهاز الكمبيوتر الخاص (الاسم المعروف له كمبيوتر شخصي ، مش كمبيوتر الجميع) سواء كان جهاز مكتبي أو محمول (لابتوب) … وطبعاً الكمبيوتر بيحتوي على كل شي متعلق فينا … سواء ملفات أو صور أو ملفات صوتية أو فيديو …. لكن بيجيك واحد بيتفلسف عليك يا إمّا يتصفح ملفاتك في غيابك للحظات أو بينزل على الجهاز ملفات ما بتحب إنها تنزل على جهازك أو ينزل لك برنامج إنت ما بدك إياه على جهازك … مثلاً مرة واحد من الشباب مسك جهازي و أنا قاعد جنبه و قال بدو ينزل برنامج تحميل … فقلت له يا فلان لاتنزله هذا البرنامج بيسوي مشاكل أنا قرأت عنه و أقل ما فيه إنه بيفتح بورتات (منافذ) الجهاز … و خلاني ساهي مع الشباب الباقيين و راح نزله و استخدمه و بعد ما خلص فحكالي إنه نزله (طبعاً أنا ارتفع امبير الضغط عندي) لأنه كان مشروع التخرج عليه و بعدني كنت شغال فيه …. المهم أخذت الجهاز منه وقتها و رحت حفظت المشروع على اليو اس بي و حطيت على الجهاز كامل كلمة  سر و سكرته …. اجى مرة ثانية المتطفل و حاول يفتح الجهاز و يلح إلا بدو يعرف كلمة السر …. طبعاً محاولاته بائت بالفشل.
طبعاً بعد أسبوع من الموضوع … شفت ملفات موجودة عندي غريبة في كل مكان و صار الانتي فايروس كل شوي و هو ناطط لي مسك تروجان وقتيها (دعيت على الشب من قلب و رب) و بسبب خمس دقايق فلسفة منه فرمتت الجهاز كامل …. ومن بعديها ممنوع أي حدا يمسك جهازي لا قدامي ولا من وراي.
طيب افرض يا أخي إنه أنا حاطط صور أهلي ومش مخبيهم ….. شو بيكون موقفك لما توصل الهن و أبهدلك و نخسر بعض عشان تطفلك هذا …(مزبوط الكلام و لا لأ؟؟)
طيب الآن أنا بعرف شغلة واحدة : الجوال أنا اللي مشتريه عشان اكلم فيه مين ما بدي و اخزن عليه شو ما بدي ، و الكمبيوتر نفس الشي ومثل ما حكيت كمبيوتر شخصي مش كمبيوتر لمّة شباب. بيجي على بالي أسئلة بتصب بنفس المعنى:
إيش المتعة الحاصلة من ورا هالتطفل ؟؟؟ وإيش استفاد ؟؟؟ وإيش هاي نشوة الانتصار هذه الي خلته يوصل لأسراري؟؟؟

يمكن يقول البعض أنها مجرد تسلية أو من باب الصداقة الزائدة (الميانة) فأنا أعرف كل أسرارك …. لا !!! ما بتعرف كل أسراري .. في أمور ما بحكي لك عنها …. و أكيد إلك أسرارك الي ما بتحكيها لأحد حتى لو كان صديقك الصدوق….

اللي بدي أوصل له إنه ما حدا يتطفل على أسرار الغير …ولا شو رأيكم؟؟؟
موضوع من حياتنا اليومية ….